پی ایچ پی اور مائی سیکول پر اردو میں ایک کتاب

میں ہمیشہ کوشش کرتا ہوں کہ نئے کمپیوٹر کے طالبعلموں‌کے لیے بہترین معلومات اپنے بلاگ پر شئر کروں۔اس سے قبل میں محمد بلال کا اردو کتابچہ، چند اپنے لکھے ہوے چھوٹے موٹے ٹیوٹوریل اور سرچ انجن آپٹیمائزیشن کی کتاب بھی اپنے بلاگ پر شیئر کر چکا ہوں مجھے امید ہے کہ بہت سے احباب اس سے مستفید ہوئے ہوں گے۔اسی سلسلے کی ایک اور کڑی پی ایچ پی پروگرامنگ لینگویج اور مائی سیکول ڈیٹا بیس کے ٹیوٹوریلز پر مبنی اردو میں ویب ڈویلپمینٹ کی ایک کتاب ہے۔

بنیادی طور پر یہ کتاب ٹیوٹوریلز کا ایک مجموعہ ہے جسے ایک پی ڈی ایف کتابچے کی صورت میں اکٹھا کر دیا گیا ہے۔ ٹیوٹوریلز کا یہ مجموعہ شکیل محمد خان صاحب کا تحریر کردہ ہے جو کہ آئی ٹی دنیا فورم کے اہم رکن ہیں۔ شکیل محمد گزشتہ چار سال سے ویب ڈویلپمینٹ کے شعبے سے وابستہ ہیں، اگرچہ وہ پروفیشنل رائٹر نہیں ہیں پھر بھی انہوں نے اپنی بہترین کوششیں اس ٹیوٹوریل کو لکھنے میں‌صرف کی ہیں۔ یہ کورس ان لوگوں کے لیے ہے جو بنیادی ویب ڈویلپمینٹ یعنی ایچ ٹی ایم ایل اور جاوا سکرپٹ سے واقف ہیں۔

پی ایچ پی جو دراصل پرسنل ہوم پیج کا مخفف ہے ایک اوپن سورس، تیز رفتار، مفت دستیاب اور طاقتور ویب ڈویلپمینٹ کمپیوٹر لینگویج ہے۔ اس کی ان خوبیوں نے موجودہ دور کے ڈویلپرز کو مجبور کر دیا ہے کہ وہ اسے سیکھیں اور اس کا استعمال کریں۔ دور حاضر کے مشہورو معروف کانٹینٹ مینجمینٹ سسٹم جوملہ، بلاگنگ سی ایم ایس ورڈ پریس، فورم سی ایم ایس وی بلیٹن اور آن لائن سٹور سی ایم ایس او ایس کامرس پی ایچ پی میں ہی تیار کیے گئے ہیں۔ دوسری طرف مائی سیکول ڈیٹا بیس جو کہ ان کانٹینٹ مینجمینٹ سسٹم کی جان ہے، پی ایچ پی کے قدم بہ قدم ان کے چلنے میں اہم کردار ادا کر رہی ہے۔

میں شکیل محمد خان کا شکر گزار ہوں‌کہ انہوں نے اپنا تکنیکی علم آئی ٹی کے نئے طالبعلموں کے لیے اس کتاب کی صورت میں‌پیش کیا، امید ہے وہ مستقبل میں‌مزید اچھے ٹیوٹوریل لکھتے رہیں گے۔
ڈھائی سو صفحات پر مبنی اس کتاب کا ڈاؤن لوڈ سائز 15 میگا بائیٹ کے قریب ہے۔ ڈاؤن لوڈ کرنے کے لیے نیچے دیا گیا ربط استعمال کریں۔

PHP Learning eBook Urdu