محمد مبشر نذیر ایک خوفناک حادثے میں شدید زخمی

محمد مبشر نذیر ایک اسلامی مصنف اور آن لائن اسلامک سٹڈیز پروگرام کے سربراہ ہیں۔ ایک طویل عرصے سے وہ لکھنے لکھانے کے ساتھ منسلک ہیں اور کامیابی سے دو عمدہ ویب سائٹس چلا رہے ہیں۔ ان کے ساتھ ملاقات کا تفصیلی احوال میں پہلے بھی اپنے بلاگ پر لکھ چکا ہوں۔

انیس دسمبر 2013 کو وہ اپنی اہلیہ کے ساتھ گھر سے کچھ ہی دور ایک میڈیکل سٹور سے کچھ دوائیاں لانے کے لیے نکلے، اگر چہ یہ ان کی روٹین کا حصہ نہیں تھا وہ باقاعدگی سے الاھلی کلب جدہ میں سکواش کھیلتے تھے تاہم اس شام انہوں نے سوچا کہ تھوڑی سی چہل قدمی بھی ہو جائے گی اور باہر کی ہوا بھی کھا لیں گے۔ وہ اپنی گھر سے چند ہی منٹوں کی مسافت پر سڑک کی ایک طرف اپنی اہلیہ کے ساتھ جا رہے تھے کہ ایک تیز رفتار گاڑی نے انہیں ٹکر مار کر سڑک پر اچھال دیا، اس زور دار ٹکر کے نیتجے میں وہ اچھل کر دور جا گرے جب کہ ان کی اہلیہ دوسری طرف جا گریں۔ گاڑی چلانے والا کوئی عرب جوان تھا جو ڈر کر یا اپنا جرم چھپانے کی خاطر موقع سے بھاگ نکلا۔ یہ سڑک چونکہ ایک ذیلی سڑک تھی چنانچہ یہاں عام راہ گیر یا دیگر گاڑیاں بہت کم تھیں۔

مبشر بھائی کی اہلیہ اس شدید ٹکر کے باوجود ہوش میں تھیں اور انہوں نے بچی کھچی توانائی جمع کر کے اپنے گھریلو ملازم کو فون پر کال کی اور حادثہ کے بارے میں اطلاع دی جو چند ہی منٹوں میں گاڑی بھگاتا جائے حادثہ پر پہنچ گیا۔

وہاں سے بذریعہ ایمبولینس دونوں زخمی افراد کو ایک قریبی ہسپتال، مستشفی جدعانی میں لایا گیا جو شارع امیر متعب پر واقع ہے۔ حادثہ کا وقت رات آٹھ بجے کا تھا اور ہسپتال پہنچتے پہنچتے تقریبا ساڑھے آٹھ بج گئے۔ مبشر نزیر کے سر میں اور ریڑھ کی ہڈی میں شدید چوٹیں آئی تھیں جب کہ ان کی اہلیہ قدرے محفوظ رہیں جنہیں ایک مختصر سرجری کے بعد تین ماہ کے آرام کی تاکید کرتے ہوے ڈاکٹروں نے وارڈ میں منتقل کر دیا۔ تاہم ان کے لیے اب بھی چلنا پھرنا ممکن نہیں جب تک وہ تین ماہ تک ٹھیک نہیں ہو جاتیں۔

مبشر بھائی سر پر لگنے والے شدید چوٹوں کے باعث ہوش میں نہیں تھے جس پر انہیں آئی سی یو میں منتقل کیا گیا اور ڈاکٹر مسلسل ان کی ذہنی حالت کا جائزہ لیتے رہے ۔ لیکن صبح تک بھی ان کی دماغی حالت بہتر نہیں ہوئی جس پر ڈاکٹر نے کہا کہ ان کے بچنے کے چانس فقط 10 فیصد ہیں تاہم اگر ان کے دماغ کا آپریشن کیا جائے تو چانس 30 فیصد تک ہو سکتے ہیں لیکن ان کو ایک شیدد دماغی جھٹکا لگ چکا ہے اور ہو سکتا ہے ان کی یاداشت کام نہ کرے یا پھر جسم کا کوئی حصہ کام نہ کرے۔ بہر حال مبشر بھائی کے گھر والوں نے آپریشن کی اجازت دے دی جس کے بعد 20 دسمبر کو دن 2 بجے مبشر بھائی کا آپریشن شروع ہوا جو رات 8 بجے تک جاری رہا۔ جس کے بعد ڈاکٹروں نے پھر انہیں آئی سی یو میں ہی منتقل کیا۔

بعد ازاں ڈاکٹروں سے بات ہونے پر پتا چلا کہ وہ ایک ہفتے تک مبشر بھائی کے ہوش میں آنے کا انتظار کریں گے اور ضرورت پڑی تو پھر آپریشن کریں گے۔ اور ان کے گھر والے اپنے آپ کو کسی بھی ممکنہ صورت حال کے لیے تیار کر لیں۔ کیوں کہ سب کچھ اللہ کے ہاتھ میں ہے۔ اور مبشر بھائی کو دعاؤں کی اشد ضرورت ہے۔ ایک معجزہ ہی انہیں عام زندگی کی طرف واپس لا سکتا ہے اور باری تعالی کے لیے کیا ممکن نہیں ہے۔ وہ ہر قسم کے معجزے کی قدرت رکھتا ہے۔

جو عرب جوان اس حادثہ کا ذمہ دار تھا اسے گھر پہنچنے پر اس کے والد نے لے جا کر پولیس کے حوالے کر دیا اور خود ہسپتال میں کافی دیر تک موجود رہا۔ پھر وہ اپنا نام پتہ اور تفاصیل بتا کر واپس چلا گیا۔

یہ سبھی باتیں مجھے کل ہسپتال میں رکنے کے دوران پتہ چلیں، جیسا کے وہاں موجود مبشر بھائی کے کولیگ اور قریبی دوست تبادلہ خیال کر رہے تھے۔ کچھ باتیں میری اہلیہ کو مبشر بھائی کی اہلیہ سے بھی پتہ چلیں، حادثہ کی کچھ تفصیلات میں اختلاف بھی تھا جو کہ مبشر بھائی کی اہلیہ کے بیان کردہ واقعات اور باہر مردوں کی بیٹھک کے بیان کردہ واقعات میں تھا۔ لیکن سبھی باتیں بعد میں کلیئر ہو جائیں گی۔ سب سے اہم بات تو مبشر بھائی کی صحت اور تندرستی ہے۔ تمام قارئین سے التماس ہے کہ ہمارے عزیز دوست اور نیک صفت انسان مبشر نذیر کے لیے دعا کریں کہ اللہ تعالی ان کو جلد صحت عطا کرے آمین