پاکستان سیمی فائنل میں

قسمت کی مہربانی پاکستانی کرکٹ ٹیم کو صرف دو میچوں کی جیت کے باوجود ٹونٹنی ٹونٹی کرکٹ کے سیمی فائنل تک لے آئی، قسمت کی مہربانی مسلسل تیسری بار پاکستان کو یہ کپ جیتنے کا موقع فراہم کر رہی ہے، دوسال قبل بھی پاکستانی ٹیم فائنل تک پہنچ پائی، لیکن آخری لمحات میں مصباح الحق کی ایک غلط شاٹ پاکستان کو لے ڈوبی یا کہہ لیں کہ قسمت نے ساتھ نہ دیا ۔ اس سے اگلے سال پاکستانی ٹیم مرد میدان کی طرح فائنل میں پہنچی، ٹیم کے ساتھ عمدہ بالر اور بیٹسمین موجود تھے تو پاکستان نے میدان مار لیا اور عزت نے یونس خان الیون کے قدم چومے۔ یہاں مزے کی ایک بات یہ کہ پاکستان کو دونوں بار عالمی کپ جتانے والے کپتان خان ہی تھے، یونس خان اور عمران خان۔ اس بار پاکستانی ٹیم کا بالنگ اٹیک کچھ کمزور ہے، فیلڈنگ اس سے بھی تھرڈکلاس، تاہم بیٹنگ گزارے لائق ہے ہی۔ چونکہ پاکستان کمزور ٹیم کے ساتھ میدان میں اترتا رہا اس لیے ابھی تک ٹورنامنٹ میں کارکردگی کچھ خاص نہیں رہی۔ دوسری طرف آسٹریلیا، دنیائے کرکٹ کی مضبوط ترین ٹیم جس کی سارے شعبے، بیٹنگ بالنگ اور فیلڈنگ، ایک سے بڑھ کر ایک ہیں۔ جیتنا تو جیسے آسٹریلیا کی عادت سی بن گئی ہے۔ ایسی ٹیم کو ھرانا جوئے شیر لانے سے بھی کچھ زیادہ ہی ہے۔ پر پاکستانیوں کو یہ بات یاد رکھنی چاہیے کہ یہ سیمی فائنل ہے ،پہلے کی طرح ہارنے کے باوجود رن ریٹ پر آگے بڑھنا ممکن نہیں ہے، بلکہ صرف جیت ہی آگے لے جا سکتی ہے۔ قسمت پاکستان کو سیمی فائنل تک لے آئی تو وہ اس میچ کو عام میچ کی طرح نہ کھیلیں بلکہ سب کھلاڑی ذمہ داری کا مظاہرہ کرتے ہوے سیمی فائنل ہی کی طرح اس میچ کو کھیلیں۔ اور قسمت کی مہربانی کا فائدہ اٹھائیں۔
اگر تو پاکستانی کھلاڑیوں نے ذمہ داری سے کھیلا تو آئندہ کچھ دنوں میں سبھی پاکستانی خوشیاں منا رہے ہوں گے، لیکن اگر ایسا نہ ہوا تو جن ہاتھوں سے ہم نے پاکستانی ٹیم کے لیے اچھا لکھا، انہی ہاتھوں سے آفریدی الیون کے لیے کھری کھری لکھ رہے ہوں گے۔