فروٹ چاٹ کے ساتھ طبع آزمائی – یوم کچن ہفتہ بلاگستان

معذرت چاہتا ہوں کہ کچھ دن کی علالت کے باعث میں مقررہ وقت پر تحاریر نہ لکھ سکا۔ویسے تو مجھے اچھی طرح کھانا پکانا نہیں آتا تھا، لیکن پردیس میں رہنے کے بعد آہستہ آہستہ کچھ چیزیں سیکھ لیں۔ ان میں سے کئی چیزیں عام سی ہیں ، جیسے چاول پکانا، سبزی پکانا، کچھ اقسام کی دالیں پکانا جو کہ اکثر حضرات اور بیشتر خواتین کو آتا ہی ہو گا۔ اس لیے میں اپنی پسند کی چیز کی ترکیب بتاتا ہوں،
رمضان المبارک میں ہم پاکستانی چٹ پٹی چیزیں کھانے لگتے ہیں جبکہ صحت کے لیے اچھی چیزیں جیسے فروٹ ، دستر خوان پر موجودگی کے باوجود کم مقدار میں کھایا جاتا ہے، ایسے میں اگر فروٹ کو یا تو بہت خوبصورت انداز سے پیش کیا جائے یا پھر اسکی کوئی ڈش بنا دی جائے تو یقینن سب فروٹ کی کچھ مقدار بھی کھا سکیں گے۔

فروٹ کی بہترین ڈش میرے خیال سے فروٹ چاٹ ہے۔ اس کو کئی طریقوں سے بنایا جا سکتا ہے، مگر ہم اسے کچھ اس طرح بناتے ہیں۔
استعمال ہونے والے پھل، سیب، کیلا، امرود، آڑو، مالٹا، کھجور، انگور اسکے علاوہ تھوڑا سا دہی، روح افزا اور چینی۔ سیب، امرود اور آڑو کا چھلکا اتارد دیں اور بعد میں سب پھلوں کے چھوٹے چھوٹے ٹکڑے کاٹ لیں، یہ ٹکڑے حسب پسند بڑے یا چھوٹے بھی کاٹ سکتے ہیں، لیکن درمیانہ سائز ایک چنے کے دانے کے برابر ہے، اگر آپکے پاس انگور بڑے سائز کا ہو تو اسکے ۲ ۲ ٹکڑے کر کے ڈالیں، اسکے بعد ایک کپ دہی میں حسب ذائقہ چینی ڈال کر، ہم تین چمچ چینی ڈالتے ہیں، مکس کر لیں اور پھر اس میں روح افزا دو کھانے کے چمچے ڈال لیں، یہ بھی حسب ذائقہ کم یا زیادہ کیا جا سکتا ہے۔ ایک اور چیز جو اس چاٹ میں ڈالنے پر بہت مزہ دیتی ہے وہ ہے سونگی (پتہ نہیں اسے اردو میں سونگی ہی کہتے ہیں یا کچھ اور، پنجابی میں ساوگی کہتے ہیں)۔
لیجیے آپ کی فروٹ چاٹ تیار ہے، ہم اسکو رمضان المبارک میں ہر روز تیار کرتے ہیں اور مزے کے ساتھ ساتھ پھلوں کے صحت افزا اجزا سے بھی لطف اندوز ہوتے ہیں۔